hamare zehn men mahshar bapa hai kya kiya jaa.e
ye dil amada-e-tark-e-vafa hai kya kiya jaa.e
musalsal barish-e-sang-e-sada hai kya kiya jaa.e
yahi meri vafaon ka sila hai kya kiya jaa.e
labon tak aa ke sab harf-e-shikayat TuuT jaate hain
ajab andaz se vo dekhta hai kya kiya jaa.e
bichhaḌ kar aap se jiine ki ḳhvahish kufr hai lekin
hamari zindagi hi be-haya hai kya kiya jaa.e
ye maana ḳhvab hai ai zaḳhm-e-nau teri ḳhalish lekin
yahan pahle hi ik mela laga hai kya kiya jaa.e
hamesha sochte rahna bhi kuchh achchha nahin hota
magar sha.ir hamesha sochta hai kya kiya jaa.e
vo insan jo mira hamraz hai ham-zad hai ‘qaisar’
vo mujh se aaj tak na-ashna hai kya kiya jaa.e
Leave a Reply