main ki ḳhush hota tha dariya ki ravani dekh kar
kaanp uTTha huun gali-kuchon men paani dekh kar
ho koi bahrup us ka dil dhaḌakta hai zarur
main use pahchan leta huun nishani dekh kar
adh-khule tanha darichon ka mujhe aaya ḳhayal
nim-va ankhon ki rangat asmani dekh kar
abr ke TukḌon ne divaren bana diin ja-ba-ja
dhuup se jalti faza ki be-karani dekh kar
ek lamhe men kaTa hai muddaton ka fasla
main abhi aaya huun tasviren purani dekh kar
aankh ke badal se kahta hai ki duniya par baras
dil lab o ruḳhsar ki sho.ala-fishani dekh kar
kis taraf le ja.egi so.e hue logon ko raat
Dar raha huun us ki ankhon men girani dekh kar
din vahin par kaTna ham ko qayamat ho gaya
aan baiThe the jahan sub.hen suhani dekh kar
dil men jo kuchh hai zaban ka za.iqa banta nahin
lafz chehra Dhanp lete hain ma.ani dekh kar
dil na jaane kaun si gahra.iyon men kho gaya
bahr ki maujon ki tahriron ko faani dekh kar
der se ‘shahzad’ kunj-e-afiyat men the asiir
ḳhush hua hai dil bala-e-na-gahani dekh kar
Leave a Reply