hamare haal se koi jo ba-ḳhabar rahta
ḳhayal us ka hamen bhi to umr-bhar rahta
jise bhi ḳhvahish-e-divar-o-dar ho sahra men
vo kam-nasib to achchha tha apne ghar rahta
hava se TuuT ke girna mira muqaddar tha
ki zard patta tha kyunkar main shaḳh par rahta
jo dekhta huun zamane ki na-shanasi ko
ye sochta huun ki achchha tha be-hunar rahta
hamari vaj.h se hoti na teri rusva.i
hamare saath agar tu na is qadar rahta
tazad qaul-o-amal men ho jis ke ai ‘nadir’
vo shaḳhs kaise nigahon men mo’atabar rahta
Leave a Reply