Hamare Dil Mein Yaadon Ko Saliqe Se Rakha Jae

Mohsin Aftab Kelapuri

hamare dil men yadon ko saliqe se rakha jaa.e

ki is kamre men phulon ko saliqe se rakha jaa.e

masiha.i ki phir koi zarurat hi nahin paḌti

agar zaḳhmon pe ashkon ko saliqe se rakha jaa.e

dilon ki hukmarani ka ye ik achchha tariqa hai

har ik jumle men lafzon ko saliqe se rakha jaa.e

adab hai din-o-duniya hai chhupa hai ilm bhi is men

mire bachcho kitabon ko saliqe se rakha jaa.e

tira ye ghar lagega ḳhubsurat ai mire bhaa.i

agar in saare rishton ko saliqe se rakha jaa.e

vo jaane vaala jaane kaun se pal lauT kar aa.e

abhi raste pe ankhon ko saliqe se rakha jaa.e

barasti hai ḳhuda ki rahmaten un ki duaon se

gharon men sab buzurgon ko saliqe se rakha jaa.e

gharibi dekhti rahti hai hasrat se khaḌi ho kar

dukanon men khilaunon ko saliqe se rakha jaa.e

paḌosi ka bhi haq hai tujh pe itna yaad rakh ‘mohsin’

munDeron par charaghon ko saliqe se rakha jaa.e