Khalid Akhlaq
ka.i dinon tak jab apne kamre se ham na nikle to log samjhe
kabhi kisi ko bahut satate hain ye ujale to log samjhe
badal ga.e jab kisi ki ghurbat men aaj raste to log samjhe
tha jaana schōl kaam par kyon ga.e vo bachche to log samjhe
hadaf pe munh-zor andhiy.on ke faqat hamare charagh kab the
bikhar ga.e jab kisi gharaunde ke saare tinke to log samjhe
koi na maane karahaten jab bata rahi thiin ki vaqt kam hai
jab un ke kandhon pe aḳhiri ham safar ko nikle to log samjhe
jo vaqt par hi na kaam aa.en to dost kya hain aziiz kya hain
kisi dukan par nahin chale jab ye khoTe sikke to log samjhe
hain bhiiḌ men bhi ham aaj tanha ye ajnabiyyat ki DhunDh kya hai
uḌe dhuen men na.e ta.alluq purane rishte to log samjhe
jise samajhte hain sha.iri ham safar musalsal hai ḳhushbuon ka
ghazal ki shaḳhon pe ḳhubsurat jo shahr mahke to log samjhe
na diin par hain amal hamare na fikr koi samaj ki hai
tarah tarah ke jab aaj ham par azaab utre to log samjhe
gham-o-ḳhushi bhi to ik nasha hai sambhalna asan nahin hai ‘ḳhalid’
bina piye bhi qadam hamare jo aaj bahke to log samjhe
Leave a Reply