aa.i nahin kya qaid hai gulshan men saba bhi
aane lagi zanjir ki kanon men sada bhi
pa ja.ega dil us men bhi taḳhsis ke pahlu
ma.alum ye hota to na karte vo jafa bhi
DhunDa kiye har gaam pe hathon ka sahara
bhule se kabhi bahr-e-dua haath uTha bhi
shane pe bikhere hue nikhri hui zulfen
barsi bhi to ghanghor ajab hai ye ghaTa bhi
bhaya hai jo mukhḌe ko chhupane ka tariqa
dekho kabhi ankhon ko charane ki ada bhi
jaise ho kanval aab men pakiza tabi.at
rahte hue duniya men hain duniya se juda bhi
har aan jafa jaan ke karte ho sitam hai
har saans ye kahti hai ki ho jan-e-vafa bhi
ankhen ye batati hain ki dil aur kahin hai
kahna tha mujhe tum se abhi is ke siva bhi
mumkin hai gire koi himala se to uTh jaa.e
‘hamid’ kabhi uTTha hai nigahon se gira bhi
Leave a Reply