kaha jab tum se chara dard-e-dil ka ho nahin sakta
to jhunjhla kar kaha tera kaleja ho nahin sakta
vo apni zid ke puure haT ke puure aan ke puure
faqat itni kami hai qaul puura ho nahin sakta
kahan ki chara-farma.i ayadat tak nahin karte
masiha.i pe marte hain aur itna ho nahin sakta
sar-e-tur un ke jalve ne pukara ḳhud-numa ho kar
ki apne chahne vaale se parda ho nahin sakta
kaha jab un se meri zindagi tum ho kaha hans kar
main samjha ab tumhen mera bharosa ho nahin sakta
mira ghar ghair ka ghar to nahin kyun-kar vo khul khelen
nigahen uTh nahin saktin ishara ho nahin sakta
‘sharaf’ aur ‘rashk’ ke kahne se kuchh tuk-bandiyan kar liin
‘hasan’ afkar men ham se do-ghazla ho nahin sakta
Leave a Reply