Hamare Darmiyan Ahd-E-Shab-E-Mahtab Zinda Hai

hamare darmiyan ahd-e-shab-e-mahtab zinda hai

hava chupke se kahti hai abhi ik khvab zinda hai

ye kis ki narm khushbu hai miri shab ki haveli men

ye kaisa raqs-e-masti ai dil-e-betab zinda hai

kahan vo sanvli shamen kahan vo reshmi baten

magar ik lams-e-hairan ka abhi zarnab zinda hai

abhi tak paniyon men surmai saae utarte hain

abhi tak dhadkanon men dard ki mizrab zinda hai

sirat-e-ishq hai aur hijr ki tanha masafat hai

vahi hai tishnagi phir bhi fareb-e-ab zinda hai

Leave a Comment