hamara man bhi usi men magan raha hoga
usi ka dhyan hamen adatan raha hoga
vo jis ko toḌne ka tera man raha hoga
qafas tha ruuh ka ya.ani badan raha hoga
tabhi to ḳhuub bahut ḳhuub lag rahi thi ghazal
tire ḳhayal ka hi pairahan raha hoga
ada-e-rasm-e-falak kar-e-aḳhiri kar ke
libas chand dobara pahan raha hoga
main chaunkta hi nahin gar mujhe ḳhabar hoti
vo tera aana hi phir daf.atan raha hoga
suna hai zikr pe mere bahut tha sanjida
vo aisa hai to nahin aisa ban raha hoga
shikan khuli jo jabin se to ban ga.i aansu
hamari fikr men kuchh ḳhaas fan raha hoga
Leave a Reply