bala-e-bam ghair hai men astan par
chahen jise chadhaen huzur asman par
kyuun na-murad aah gai asman par
tuute na asman kahin meri jaan par
rusvaiyan hain saath vo chhup kar hazar jaan
sau sau ke sar jhuke hain qadam ke nishan par
aana use zarur go hon laakh ehtimam
ashiq hai un ki niind miri dastan par
tha raz-dar-e-husn vo kafir jo kah gaya
maashuq dil ki baat na laaen zaban par
un ki gali men raat men is vaza se gaya
ghabra ke pasban gire pasban par
nazuk si tegh-e-yar hai kya zahr ki bujhi
khaae hue hai zahr mire imtihan par
bante hain shokhiyon se vo suraj bhi chand bhi
naqsh-e-qadam bhi aap ke hain asman par
khalvat men bhi chali hain kahin sina-zoriyan
is tarah aap tan ke uthe kis guman par
zikr-e-mai-e-tahur ne tadpa diya ‘riyaz’
jaana pada hamen kisi unchi dukan par