ham-nashin raat hai to raat bhi Dhal ja.egi
sub.h-dam surat-e-halat badal ja.egi
hiddat-e-shauq salamat hai to zanjir-e-jafa
surat-e-sham.a kisi roz pighal ja.egi
un ka dam bharte ho to gham na karo aḳhir-kar
un pe dam dene ki hasrat bhi nikal ja.egi
ham-safiro kabhi miTti hai tamanna-e-bahar
ye kisi phuul kisi sho.ale men Dhal ja.egi
yahi behtar hai ki qurban-e-vafa ho jaa.e
jaan agar aaj na ja.egi to kal ja.egi
kis ko ma.alum tha malbus-e-saba men sarsar
aa ke gulshan men shagufon ko masal ja.egi
ab ke savan bhi agar abr na barsa ‘aḳhtar’
jo kali shaḳh pe niklegi vo jal ja.egi
Leave a Reply