hal hi na ho jis ka vo muamma to nahin hai
maktub-e-azal harf-e-tamanna to nahin hai
dil hi ki ḳhuda.i hai yahan aaj bhi ai dost
paband-e-nazar kaif ki duniya to nahin hai
be-bahra-e-irfan-e-mohabbat hai azal se
socha hai tujhe aql ne dekha to nahin hai
andoh ba-daman na ho ḳhud mauj-tarannum
avaz ka har sho.abada naghma to nahin hai
har raah nazar aane lage mujh ko rah-e-rast
be-rah-ravi tera ye mansha to nahin hai
gham kya agar azad-e-musalsal hai miri ziist
minnat-kash-e-ejaz-e-masiha to nahin hai
‘yaqub’ sunana hai mujhe dil ki zaban men
afsane ka pahlu koi tishna to nahin hai
Leave a Reply