Hain Kaam-Kaj Itne Badan Se lipaT Gae

Poet

hain kam-kaj itne badan se lipaT ga.e

logon ke shahar-bhar se ravabit hi kaT ga.e

manzar the duur duur to kitne hasin the

tasvir zoom ki hai to pixel hi phaT ga.e

chehre jhulas chuke hain tamasha-e-ishq men

ai ishq kis tarah tire me.aar ghaT ga.e

main ḳhvab ḳhamushi mira saaya hue hain jam.a

jab log apne apne girohon men baT ga.e

qudrat ka canvas na mukammal dikha.i de

kitne hi rang meri nigahon se haT ga.e

ik zahr hai samaj ke andar bhara hua

itni samog hai ki tanaffus ulaT ga.e

ankhen bhula chuki hain ḳhad-o-ḳhal-e-raushni

badal to asman se kab ke hain chhaT ga.e

‘zishan’ use ḳhayal men rakkha tha mustaqil

ahistagi se baaqi ḳhayalat haT ga.e