Hasan Naim
aarzu thi ki tira dahr bhi shohra hove
teri nisbat se ghazal ham-sar-e-zohra hove
kaun deta hai mujhe ḳhvab ki mash.al har aan
aas ban kar na vahi qalb men Thahra hove
ye na mehman-sara hai na havas ka kucha
dil men vo shaḳhs base aa ke jo gahra hove
mauja-e-vaqt men ru-posh hai vo mah-e-tamam
chandni hove jahan yaad ka bajra hove
dhund hi dhund nazar aaya jidhar bhi dekha
meri duniya mire arman ka na chehra hove
dil ke angan men koi aa ke na jaa.e vapas
is ilaqa men agar ishq ka pahra hove
us ki tasvir men yuun rang-e-alamat rakhiyo
vo kahin nuur kahin phuul ka gajra hove
itni tasir to fariyad ki qismat ho ‘na.im’
hakim-e-vaqt badal jaa.e jo bahra hove
Leave a Reply