Hain Jalwa-E-Tan Se Dar-O-Diwar Basanti

hain jalva-e-tan se dar-o-divar basanti

poshak jo pahne hai mira yaar basanti

kya fasl-e-bahari ne shagufe hain khilae

maashuq hain phirte sar-e-bazar basanti

genda hai khila baagh men maidan men sarson

sahra vo basanti hai ye gulzar basanti

us rashk-e-masiha ka jo ho jaae ishara

ankhon se bane nargis-e-bimar basanti

gendon ke darakhton men numayan nahin gende

har shakh ke sar par hai ye dastar basanti

munh zard dupatte ke na anchal se chhupao

ho jaae na rang-e-gul-e-rukhsar basanti

khilti hai mire shokh pe har rang ki poshak

udi, agari, champai, gulnar, basanti

hai lutf hasinon ki do-rangi ka ‘amanat’

do chaar gulabi hon to do chaar basanti

Leave a Comment