hain ghar ki muhafiz miri dahki hui ankhen
main taaq men rakh aaya huun jalti hui ankhen
ik pal bhi kisi moḌ pe rukne nahin detin
kanTon ki tarah jism men chubhti hui ankhen
raste men qadam phunk ke rakhna mere pyaro
hain charon taraf shahr men bikhri hui ankhen
yuun us ke bichhaḌ jaane pe aansu na bahao
manzar ko taras ja.engi bhigi hui ankhen
qatil ke siva koi samajh hi nahin sakta
kya dekhti hain tasht men rakkhi hui ankhen
kya janiye kis ḳhvab ki ta.abir men gum hain
zulfon ki ghani chhanv men uljhi hui ankhen
‘saghar’ shab-e-tira men ujalon ki amiin hain
nafrat ke samundar men ye bahti hui ankhen
Leave a Reply