hai vaj.h koi ḳhaas miri aankh jo nam hai
bas itna samajhta huun ki ye un ka karam hai
ye ishq ki me.araj hai ya un ka karam hai
har vaqt mire samne tasvir-e-sanam hai
ka.abe se ta.alluq hai na but-ḳhane ka gham hai
hasil mire sajdon ka tira naqsh-e-qadam hai
divanon pe kis darja tira lutf-o-karam hai
baḳhsha hai jo gham tu ne vahi hasil-e-gham hai
sar jab se jhukaya hai dar-e-yar pe main ne
mehrab-e-ḳhudi jalva-gah-e-sham-e-haram hai
kya kaam zamane se use ai shah-e-ḳhuban
taqdir men jis ki tiri furqat ka alam hai
kaunain badal jaa.e magar tu na badalna
tere hi sabab ahl-e-mohabbat ka bharam hai
palkon pe bikharte hain tiri yaad ke moti
har ashk-e-nadamat tira andaz-e-karam hai
zahir men koi ka.aba koi dair-o-kalisa
batin men har ik chiiz tira naqsh-e-qadam hai
kar apni nazar se mire iman ka sauda
ai dost tujhe meri mohabbat ki qasam hai
ye umr guzar jaa.e magar hosh na aa.e
sar shauq-e-ibadat men dar-e-yar pe ḳham hai
ai dost tire ishq men pahuncha huun yahan tak
ankhon men sanam-ḳhana hai siine men haram hai
kis tarah ‘fana’ chhoḌun sanam-ḳhana-e-ulfat
hasil mire iman ka didar-e-sanam hai
duniya se nirali hai ‘fana’ maqtal-e-ulfat
is maqtal-e-ulfat men jo sar hai vo qalam hai
Leave a Reply