hai dil men junun-ḳhez parastish ka irada
aise men munasib nahin ranjish ka irada
jalne ko hai tayyar mata-e-dil-o-jan phir
afsos magar sard hai atish ka irada
miTTi ka gharaunda baḌi mushkil se bana hai
ai kaash badal de koi barish ka irada
yuun khul ke sar-e-am na mil mujh se mire dost
duniya men hai zinda abhi sazish ka irada
kashkol mohabbat ki talab phir bhaḌak uTThi
dekha jo ba-zid us men navazish ka irada
us ne baḌa mohtat ravayya rakha phir bhi
lahje se jhalakta raha ḳhvahish ka irada
us dil ka ilaqa sahi mere liye mamnua
badla na ba-har-hal riha.ish ka irada
hai ma.arka-ara jo ‘ḳhayal’ aaj ba-zahir
rakhta hai pas-e-taish guzarish ka irada
Leave a Reply