chehre pe saare shahr ke gard-e-malal hai
jo dil ka haal hai vahi dilli ka haal hai
uljhan ghuTan hiras tapish karb intishar
vo bhiiḌ hai ke saans bhi lena muhal hai
avargi ka haq hai havaon ko shahr men
ghar se charagh le ke nikalna muhal hai
be-chehragi ki bhiiḌ men gum hai har ik vajud
a.ina puchhta hai kahan ḳhadd-o-ḳhal hai
jin men ye vasf ho ki chhupa len har ek daagh
un a.inon ki aaj baḌi dekh-bhal hai
parchha.iyan qadon se bhi aage nikal ga.iin
suraj ke Duub jaane ka ab ehtimal hai
kashkol-e-chashm le ke phiro tum na dar-ba-dar
‘manzur’ qaht-e-jins-e-vafa ka ye saal hai
Leave a Reply