Intiqam

Noon Meem Rashid

us ka chehra, us ke khadd-o-khal yaad aate nahin

ik shabistan yaad hai

ik barhana jism atish-dan ke paas

farsh par qalin, qalinon pe sej

dhaat aur patthar ke but

gosha-e-divar men hanste hue!

aur atish-dan men angaron ka shor

un buton ki be-hisi par khashm-gin

ujli ujli unchi divaron pe aks

un farangi hakimon ki yadgar

jin ki talvaron ne rakkha tha yahan

sang-e-buniyad-e-farang!

us ka chehra us ke khadd-o-khal yaad aate nahin

ik barhana jism ab tak yaad hai

ajnabi aurat ka jism,

mere honton ne liya tha raat bhar

jis se arbab-e-vatan ki be-hisi ka intiqam

vo barhana jism ab tak yaad hai!