Hai Aur Baat Bahut Meri Baat Se Aage

Zafar Iqbal

hai aur baat bahut meri baat se aage

zamin zarra hai is kaenat se aage

ik aur silsila-e-hadsat hai raushan

is ek silsila-e-hadsat se aage

hava-e-aks-e-bahar-o-khizan nahin hai faqat

agar nigah karo phuul paat se aage

ye ham jo pet se hi sochte hain shaam o sahar

kabhi to jaenge is dal-bhat se aage

kuchh aur tarah ke atraf muntazir hain kahin

uthaen zahmat agar shash-jahat se aage

na rok paae taghayyur ki tez tughyani

jo band bandhne aae sabat se aage

kuen men baith ke hi tartara gae kuchh din

nazar pada nahin kuchh apni zaat se aage

is aab o rang se bahar bhi ik tamasha hai

chale-chalo jo nazar ki sifat se aage

‘zafar’ ye din to natija hai raat ka yaksar

kuchh aur dhundta rahta huun raat se aage