Afroz Alam
guzre lamhat ka ehsas hua jaata hai
daman-e-vaqt yunhi mujh se chhata jaata hai
main ujale ko mohabbat ka khuda likhta huun
vo andhere hi se manus hua jaata hai
jis ki khushbu se fazaon men mahak thi shab-bhar
sub.h-dam us ki taraf saanp badha jaata hai
mujh ko dar hai koi aabid na bahak jaae kahin
dil-ruba chand ka andaz hua jaata hai
duur rah kar bhi rag-e-jan se lipat jaate hain
aur is dil men ujala sa hua jaata hai
is qadar zahr pilaya mujhe us ne ‘alam’
talkhi-e-zist ka ehsas mita jaata hai
Leave a Reply