kaam hain aur zaruri ka.i karne ke liye
kaun baiTha hai tire ishq men marne ke liye
raat guzre hue ḳhvabon ki rida oḌhe thi
subah-e-tabir ke chilman pe bikharne ke liye
istada the sitare tiri dahliz ke saath
chand be-chain tha angan men utarne ke liye
dast-e-fan-kar ki fankari ka aalam ye ho
naqsh be-chain ho patthar pe ubharne ke liye
koi manzil to mile abla-pa.i ke tufail
koi surat to bane chehra sanvarne ke liye
is hujum-e-kas-o-na-kas ko bhi jaana hai kahin
rasta dijiye is ko bhi guzarne ke liye
Leave a Reply