vo naqab aap se uth jaae to kuchh duur nahin
varna meri nigah-e-shauq bhi majbur nahin
khatir-e-ahl-e-nazar husn ko manzur nahin
is men kuchh teri khata dida-e-mahjur nahin
laakh chhupte ho magar chhup ke bhi mastur nahin
tum ajab chiiz ho nazdik nahin duur nahin
jurat-e-arz pe vo kuchh nahin kahte lekin
har ada se ye tapakta hai ki manzur nahin
dil dhadak uthta hai khud apni hi har aahat par
ab qadam manzil-e-janan se bahut duur nahin
haae vo vaqt ki jab be-piye mad-hoshi thi
haae ye vaqt ki ab pi ke bhi makhmur nahin
husn hi husn hai jis samt uthata huun nazar
ab yahan tuur nahin barq-e-sar-e-tur nahin
dekh sakta huun jo ankhon se vo kaafi hai ‘majaz’
ahl-e-irfan ki navazish mujhe manzur nahin
Leave a Reply