guzar gaya jo mire dil pe saneha ban kar
utar gaya vo miri ruuh men ḳhuda ban kar
tira ḳhayal shab-e-hijr phailta hi gaya
hazar rang ki sochon ka silsila ban kar
vafa ke sang se Takra ke ehtijaj-e-ana
salib-e-lab pe sisakne laga dua ban kar
badan ke dasht men man ki hasin sub.hon ko
nikal raha hai gham-e-dahr azhdaha ban kar
kabhi to diip jalen gul khilen faza mahke
kabhi to aa shab-e-viran men ratjaga ban kar
tamam umr jise DhunDte rahe ‘a.ali’
kahin mila bhi agar vo to fasla ban kar
Leave a Reply