guftugu band na ho
baat se baat chale
subh tak sham-e-mulaqat chale
ham pe hansti hui ye taron bhari raat chale
hon jo alfaz ke hathon men hain sang-e-dushnam
tanz chhalkae to chhalkaya kare zahr ke jaam
tikhi nazren hon tursh abru-e-khamdar rahen
ban pade jaise bhi dil sinon men bedar rahen
bebasi harf ko zanjir-ba-pa kar na sake
koi qatil ho magar qatl-e-nava kar na sake
subh tak dhal ke koi harf-e-vafa aaega
ishq aaega ba-sad laghzish-e-pa aaega
nazren jhuk jaengi dil dhadkeenge lab kanpenge
khamushi bosa-e-lab ban ke mahak jaegi
sirf ghunchon ke chatakne ki sada aaegi
aur phir harf-o-nava ki na zarurat hogi
chashm o abru ke isharon men mohabbat hogi
nafrat uth jaegi mehman muravvat hogi
haath men haath liye saara jahan saath liye
tohfa-e-dard liye pyaar ki saughat liye
regzaron se adavat ke guzar jaenge
khuun ke dariyaon se ham paar utar jaenge
guftugu band na ho
baat se baat chale
subh tak sham-e-mulaqat chale
ham pe hansti hui ye taron bhari raat chale
Leave a Reply