qateel-shifai

Girya-E-Mast

ahbab se chhup chhup ke bhi roya huun main aksar

par aaj bhari bazm men

rone ka maza aur hi kuchh hai

ahbab ko hairat ki mire qahqaha-bardar labon par

kyuun le gaiin sabqat miri bhigi hui palken

mire tapte hue aansu

shayad mire ahbab ko maalum nahin hai

izhar masarrat kabhi hota hai jo ro kar

sau baar ka hansna bhi use chhu nahin sakta

aansu hain vo moti

palkon ke sadaf se jo nikalte hain usi dam

jab dil ke samundar men

khushi ka koi tufan bapa ho

tufan sama sakta nahin sirf hansi men

aansu hi use apni taravat men sameten to sameten

aansu ki jasamat men hain qatre se bhi kuchh kam

izhar masarrat men samundar se bade hain

behis mire ahbab hain

kaash un ko batae koi hamdam

hasil jo khushi aaj hui hai mire dil ko

shayad vo tabassum men sameti hi na jaati

honton pe tabassum bhi bahut khuub hai lekin

ankhon men tarashshoh ki faza aur hi kuchh hai

us bazm men rone ka maza aur hi kuchh hai

More Poems

Leave a Comment