Arman Najmi
girte ubharte Dubte dhare se kaT gaya
dariya simaT ke apne kinare se kaT gaya
mausam ke sard-o-garm ishare se kaT gaya
zaḳhmi vajud vaqt ke dhare se kaT gaya
kya farq us ko jaḌ se ukhaḌa gaya jise
TukḌe kiya tabar ne ki aare se kaT gaya
tanha.i ham-kanar hai sahra ki rat-bhar
kaise main apne chand sitare se kaT gaya
chalta hai apne paanv pe ab an-ban se
achchha hua vo jhuTe sahare se kaT gaya
divaren unchi hoti ga.iin as-pas ki
ghar mera pesh-o-pas ke nazare se kaT gaya
nikla tha ik qadam hi had-e-ehtiyat se
sho.alon se bachne vaala sharare se kaT gaya
aata nahin yaqin ki nazar us ne pher li
kaise vo apne dard ke maare se kaT gaya
Leave a Reply