adil-mansuri

Ghum Raha Tha Ek Shakhs Raat Ke Khaarzar Mein

ghuum raha tha ek shakhs raat ke kharzar men

us ka lahu bhi mar gaya subh ke intizar men

ruuh ki khushk pattiyan shakh se tutti rahin

aur ghata baras gai jism ke regzar men

rang men rang ghul gae aks ke shishe dhul gae

qaus-e-quzah pighal gai bhigi hui lagar men

thanDi sadak thi be-khabar garm dinon ke qahr se

dhuup ko jhelte rahe ped khade qatar men

bahti hava ki mauj men tair rahe the sabz ghar

shahr ajiib sa laga raat chadhe khumar men

niind bhi jagti rahi puure hue na khvab bhi

subh hui zamin par raat Dhali mazar men

deta javab kya koi mere siva na tha koi

Duub ke rah gai sada tang siyah ghaar men

More Poems

Leave a Comment