ghash bhi aaya miri pursish ko qaza bhi aa.i
be-muravvat tujhe kuchh sharm o haya bhi aa.i
mausam-e-husn to tha fasl-e-jafa bhi aa.i
saath hi saath javani ki ada bhi aa.i
dam ka ankhon men aTakna bhi mubarak na hua
vaqt ki baat tum aa.e to qaza bhi aa.i
main shab-e-vasl ye samjha ki sahar bhi kuchh hai
vo jo aa.e to mo.azzin ki sada bhi aa.i
un marizon ki ayadat ko vo ab nikle hain
maut ja kar jinhen miTTi men mila bhi aa.i
kar diya soz-e-darun ne mujhe sham.a sar-e-bazm
ban ga.i dam pe agar paas hava bhi aa.i
kaan yuun un ke bhare hain miri fariyadon ne
naale samjhe jo koi aur sada bhi aa.i
phir bhi ‘saqib’ na uḌi tala-e-ḳhufta ki niind
aah ja kar miri gardun ko hila bhi aa.i
Leave a Reply