poet

In Zalimon Ko Jaur Siwa Kaam Hi Nahin

in zalimon ko jaur siva kaam hi nahin

goya ki un ke zulm ka anjam hi nahin

gham vasl men hai hijr ka hijran men vasl ka

hargiz kisi tarah mujhe aram hi nahin

kya kya kharabiyan main tire vaste sahin

tis par bhi chahne ka mire naam hi nahin

ab ham dinon ko apne na roen to kya karen

karne the jin men aish ve ayyam hi nahin

ve shakhs jin se fakhr jahan ko tha ab ve haae

aise gae ki un ka kahin naam hi nahin

tum jo har ik ke dil ko satate ho kya miyan

aghaz ka jafa ke kuchh anjam hi nahin

‘taban’ bata main ijz kahan tak kiya karun

juz tark-e-mehr-yar ka paigham hi nahin

More Poems

Leave a Comment