Riyaz Khairabadi
gharib ham hain gharibon ki bhi khushi ho jaae
nazar huzur idhar bhi kabhi kabhi ho jaae
ghurur bhi jo karun main to ajizi ho jaae
khudi men lutf vo aae ki be-khudi ho jaae
gham-e-firaq ki sakhti visal se badle
jo maut aae mujhe meri zindagi ho jaae
miri sharab ki kya qadr tujh ko ai vaaiz
jise main pi ke dua duun vo jannati ho jaae
main us nigah ke sadqe ye ho asar jis men
ki dil men dard bhi utthe to gudgudi ho jaae
sitam bhi ho to sitam men vo lutf pinhan ho
ki naala aa ke mire honth par hansi ho jaae
na puchho bada-gusaran-e-bazm-e-‘varis’ ki
ye dekh len su-e-vaiz to vo vali ho jaae
hata raha huun shab-o-roz is liye khud ko
fana ke raaz se mujh ko bhi agahi ho jaae
tiri nigah-e-karam se ajab nahin varis
‘riyaz’ sa sag-e-duniya bhi aadmi ho jaae
Leave a Reply