ghar ki surat jo bhi ho us par hirasan main nahin
dar muqaffal hain to divaron se larzan main nahin
tujh men himmat hai so phir shishe men mujh ko bhi utaar
haan magar ye jaan le itna bhi asan main nahin
nafraton ki tah men kitni chahaten hain ye to soch
tu gurezan ho to ho tujh se gurezan main nahin
raushni dil men agar ho ik sitara hi bahut
Dubte suraj ke manzar se pareshan main nahin
main ki apni zaat men sho.ala bhi huun shabnam bhi huun
phir bhi apne-ap se dast-o-gareban main nahin
raste ke pech-o-ḳham mere lahu ki taak men
baḳht ke andhe kuen men pa-ba-jaulan main nahin
mausamon ki dhuup se kajla gaya chehre ka rang
aadmi huun be-niyam-e-barq-o-tufan main nahin
sochta huun kis ḳharabe men mujhe laaya gaya
apne hone par ba-har-surat pasheman main nahin
Leave a Reply