gham ne dilon ko raam kiya aur guzar gaya
zalim ne apna kaam kiya aur guzar gaya
sayyad kuchh to ḳhatir-e-ahal-e-vafa kare
ye kya asir-e-dam kiya aur guzar gaya
ai saqi-e-bahar tire zauq ke nisar
har gul ko ek jaam kiya aur guzar gaya
aaya tha but-kada bhi miri rah-e-shauq men
main ne to ik salam kiya aur guzar gaya
ye ka.enat hai ki kisi ne ba-sad hijab
ik ḳhaas jalva aam kiya aur guzar gaya
aaya qarib ‘kaif’ koi mast-e-naz-e-husn
Daali nazar ghulam kiya aur guzar gaya
Leave a Reply