Munir Anwar
gham ko ḳhud par savar mat karna
zaḳhm ko ishtihar mat karna
ek had men raho to achchha hai
had ki divar paar mat karna
apni parvaz bhuul jaoge
ghair par inhisar mat karna
sar uThana muhal ho jaa.e
ḳhud ko yuun zer-e-bar mat karna
vaqt kab intizar karta hai
vaqt ka intizar mat karna
baat karna to samne karna
piiTh pichhe se vaar mat karna
hausle se saharna gham ko
dard ko be-vaqar mat karna
chahaton ke hisab men ‘anvar’
ek pal bhi udhar mat karna
Leave a Reply