Ehsan Jafri
gham-ḳhvar hain jo un ka chalan dekh raha huun
bechaini-e-arbab-e-vatan dekh raha huun
bigḌa hua duniya ka chalan dekh raha huun
lipTa hua sho.alon men vatan dekh raha huun
kis falsafa-e-zist ko siine se laga.un
har laash ko be-gor-o-kafan dekh raha huun
ab baar hai ehsas-e-masarrat rag-e-jan par
dekhe nahin jo ranj-o-mehan dekh raha huun
gandhi ka vo paigham-e-mohabbat-o-uḳhuvvat
ujḌa hua gandhi ka chaman dekh raha huun
Leave a Reply