gham ke mujrim ḳhushi ke mujrim hain
log ab zindagi ke mujrim hain
aur koi gunah yaad nahin
sajda-e-be-ḳhudi ke mujrim hain
istighasa hai raah o manzil ka
rahzan rahbari ke mujrim hain
mai-kade men ye shor kaisa hai
bada-kash bandagi ke mujrim hain
dushmani aap ki inayat hai
ham faqat dosti ke mujrim hain
ham faqiron ki suraton pe na ja
ḳhidmat-e-admi ke mujrim hain
kuchh ghazalan-e-agahi ‘saghar’
naghma-o-sha.eri ke mujrim hain
Leave a Reply