abdul-majeed-salik

Gham Ke Hathon Mere Dil Par Jo Saman Guzra Hai

gham ke hathon mire dil par jo saman guzra hai

hadisa aisa zamane men kahan guzra hai

zindagi ka hai khulasa vahi ik lamha-e-shauq

jo tiri yaad men ai jan-e-jahan guzra hai

hal-e-dil gham se ye hai jaise kisi sahra men

abhi ik qafila-e-nauha-garan guzra hai

bazm-e-doshin ko karo yaad ki is ka har rind

raunaq-e-bar-gah-e-pir-e-mughan guzra hai

pa-ba-gul jo the vo azurda nazar aate hain

shayad is raah se vo sarv-e-ravan guzra hai

nigrani-e-dil-o-dida hui hai dushvar

koi jab se miri janib nigaran guzra hai

hal-e-dil sun ke vo azurda hain shayad un ko

is hikayat pe shikayat ka guman guzra hai

vo gul-afshani-e-guftar ka paikar ‘salik’

aaj kuche se tire ashk-fishan guzra hai

More Poems

Leave a Comment