gham-e-zamana nahin ik azaab hai saaqi
sharab la miri halat kharab hai saaqi
shabab ke liye tauba azaab hai saaqi
sharab la mujhe pas-e-shabab hai saaqi
utha piyala ki gulshan pe phir barasne lagi
vo mai ki jis ka qadah mahtab hai saaqi
nikal parda-e-mina se dukhtar-e-raz ko
ghata men kis liye ye mahtab hai saaqi
tu vaizon ki na sun mai-kashon ki khidmat kar
gunah savab ki khatir savab hai saaqi
zamane-bhar ke ghamon ko hai davat-e-gharra
ki ek jaam men sab ka javab hai saaqi
kalam jis ka hai mearaj ‘hafiz’-o-‘khayyam’
yahi vo ‘akhtar’-e-khana-kharab hai saaqi
Leave a Reply