Aijaz Asad
gham-e-vafa ko pas-e-pusht dalna hoga
khaTak raha hai jo kanTa nikalna hoga
faqir-e-ishq huun kuchh de ke Talna hoga
bas ik nigah ka sikka uchhalna hoga
saval dosto azmat ka hai saron ka nahin
hamen vaqar ka parcham sambhalna hoga
ghazab ki pyaas lagi samna sarab ka hai
so reg-e-sahra se paani nikalna hoga
use batao ki faaqa hai aaj apna bhi
magar faqir ko izzat se Talna hoga
ye intizar salamat rahe vo aaega
magar hai shart ki dil ko sambhalna hoga
tumhare dil ki zamin jal chuki magar ‘aijaz’
isi se naḳhl-e-mohabbat nikalna hoga
Leave a Reply