chand nikle kisi janib tiri zebai ka
rang badle kisi surat shab-e-tanhai ka
daulat-e-lab se phir ai khusrav-e-shirin-dahanan
aaj arzan ho koi harf shanasai ka
garmi-e-rashk se har anjuman-e-gul-badanan
tazkira chhede tiri pairahan-arai ka
sehn-e-gulshan men kabhi ai shah-e-shamshad-qadan
phir nazar aae saliqa tiri raanai ka
ek baar aur masiha-e-dil-e-dil-zadagan
koi vaada koi iqrar masihai ka
diida o dil ko sambhalo ki sar-e-sham-e-firaq
saz-o-saman baham pahuncha hai rusvai ka