gham-e-hayat miTana hai ro ke dekhte hain
lahu ka daagh lahu se hi dho ke dekhte hain
atash ki niind bahut baḌh ga.i hai ankhon men
chalo furat ki bahon men so ke dekhte hain
hamen hamare alava bhi janta hai koi
virasaton ki ye pahchan kho ke dekhte hain
tamam umr bahut ro.e zindagi ke liye
ab apni laash pe kuchh der ro ke dekhte hain
ajiib log hain lashon men zindagi ke nishan
har ek jism men neza chubho ke dekhte hain
is aarzu men badan ho gaya hai zaḳhm-alud
ki ek raat gulabon pe so ke dekhte hain
ham aadmi ki tarah ji rahe hain sadiyon se
chalo ‘salim’ ab insan ho ke dekhte hain
Leave a Reply