Gham-E-Gunah Se Fikr-E-Najat Se Uljhe

Qadir Siddiqi

gham-e-gunah se fikr-e-najat se uljhe

tamam umr ham afsun-e-zat se uljhe

tavahhumat se ik jang thi jo jaari rahi

sahab-e-marg na abr-e-hayat se uljhe

nafas nafas pe nigahen tiri badalti rahin

qadam qadam pe na.e hadsat se uljhe

tujhe jo maan liya ham ne bas vo maan liya

zaban sifat pe na kholi na zaat se uljhe

kabhi ḳhirad se nipaTna paḌa kabhi dil se

taghayyurat se uljhe sabat se uljhe

bahut sataya guzishta dinon ki yadon ne

yahi nahin ki na.e vaqi.at se uljhe

tazad laakh raha phir bhi zindagi ke liye

gham-e-ana se gham-e-ka.enat se uljhe

ham is zamane men kis ko suna.en kaun sune

dil-o-nigah ki jin vardat se uljhe

bisat-e-zist saja.i tiri ḳhushi ke liye

na jiit se kabhi uljhe na maat se uljhe

hamin ne teri nigah-e-ghazab ko jhela hai

hamin tiri nigah-e-iltifat se uljhe