Gham-E-Darun Ka Koi Tarjuman Nahin Na Sahi

gham-e-darun ka koi tarjuman nahin na sahi

jo zaḳhm-e-dil bhi dahan-e-fughan nahin na sahi

ye kam nahin hai ki ankhon men dil utar aaya

tumhare samne munh men zaban nahin na sahi

yahan to koi nahin jis ka dil hila doge

jigar men taqat-e-zabt-e-fughan nahin na sahi

tujhi se shikva-e-dard-e-nihan karen ai dil

tire siva jo koi razdan nahin na sahi

chaman men aag laga di jo barq-e-sozan ne

to shaḳh-e-gul pe mira ashiyan nahin na sahi

abhi kuchh aur gharaunde banao yadon ke

ghubar-e-rah to hai karvan nahin na sahi

zamin to paanv tale hai yahi ghanimat hai

hamare zer-e-qadam asman nahin na sahi