ghair-mumkin bhi hai mumkin mujhe ma.alum na tha
ek din aa.ega ye din mujhe ma.alum na tha
aur kuchh main tire zahir se samajhta tha tujhe
aur kuchh hai tira batin mujhe ma.alum na tha
apne daman-e-tasanno.a men chhupa sakte hain
un ma.a.ib ko mahasin mujhe ma.alum na tha
dushmani ke liye maḳhsus hai jo tarz-e-amal
dosti men hai vo mumkin mujhe ma.alum na tha
aah ho sakti hai bedad pe maa.il vo nazar
ho jo altaf ki zamin mujhe ma.alum na tha
umr-bhar sabr na aa.ega mujhe jis ke baghair
chain pa.ega vo mujh bin mujhe ma.alum na tha
bahama garmi-e-dil nabz-e-mohabbat ik din
ho ke rah ja.egi sakin mujhe ma.alum na tha
aah is umr-e-mohabbat men kabhi ai ‘bismil’
ek din aa.ega ye din mujhe ma.alum na tha
Leave a Reply