ghaDi Bhar Rang Nikhra Surat-E-Gul-Ha-E-Tar Mera

ghaḌi bhar rang nikhra surat-e-gul-ha-e-tar mera

usi hasti pe us gulshan men tha ye shor-o-shar mera

nizam-e-bazm-e-duniya hashr ke maidan ka naqsha hai

yahi hai shamat-e-isyan bhaTakna dar-ba-dar mera

samajhta huun vasila maghfirat ka sharm-e-isyan ko

ki ashkon se mire dhul ja.ega daman-e-tar mera

faza-e-ka.aba-e-at.har ka naqsha aankh se dekhun

ilahi is hava men ḳhushk ho daman-e-tar mera

dar-e-ka.aba pe jab sajde kiye avaz ye aa.i

buton ki Thokaren kha kar tujhe sujha hai ghar mera

naqab-e-husn jab uTTha to ankhen khul ga.iin meri

farogh-e-husn tha dam-bhar ko manind-e-sharar mera

use parde men rah kar bhi ḳhayal aata hai rah rah kar

ki raaz ifsha na kar de ḳhalq men husn-e-bashar mera

guzar kar ḳhana-e-dil se baḌhun kyuun tuur ki janib

ki barq-e-husn se jalne ko hai maujud ghar mera

sanam qadmon pe girte hain zabanen band rahti hain

buton par ro.ab hai allahu-akbar is qadar mera

mohabbat ki har ik manzil pe sahra-e-adam nikla

ḳhizar bhi saath de sakte nahin har gaam par mera

farishte bhi na samjhe aaj tak meri haqiqat ko

ki taj-e-ashraf-e-maḳhluq ki zinat hai sar mera

zaban par zikr jaari tha barabar hamd-e-ḳhaliq ka

azal men kaam Thahra mid.hat-e-ḳhairul-bashar mera

zaban-e-sham.a main ne kaaT li hai bad-guman ho kar

ki raaz ifsha na kar de sub.h ko sham-e-sahar mera

miri hasti se pahle kaun samjha sirr-e-vahdat ko

rahega tazkira dair-o-haram men umr-bhar mera

vo qatra huun ki jis ki mauj men bahr-e-haqiqat hai

vo zarra huun ki munh takte hain ḳhurshid-o-qamar mera

dil-e-majruh ki halat pe rahm aaya masiha ko

dava ke naam par hansne laga zaḳhm-e-jigar mera

zara piine to de saaqi sharab-e-ma.arifat mujh ko

udhar phir ja.ega qibla bhi ruḳh hoga jidhar mera

sada-e-kalematul-haq men tiri tahrik shamil hai

anal-haq kahta hai har qatra-e-ḳhun-e-jigar mera

yahi surat hai ab taqdir ke chakkar nikalne ki

ilahi astana ho haram ka aur sar mera

tujhe ai charḳh kya malum rutba dard-e-ulfat ka

karega naam raushan ḳhalq men dagh-e-jigar mera

tamanna hai ki ‘rasiḳh’ hamd-goi ke vasile se

riyaz-e-dahr men naḳhl-e-suḳhan ho bar-var mera