Saba Akbarabadi
ghaliban mere alava koi guzra bhi nahin
teri manzil men kahin naqsh-e-kaf-e-pa bhi nahin
aap ki raah men duniya nazar aati hai mujhe
ik qadam aur jo baḌh ja.un to duniya bhi nahin
aap kya soch ke gham apna ata karte hain
himmat-e-dil to ba-qadr-e-gham-e-duniya bhi nahin
tum to be-misl ho tauhid-e-mohabbat ki qasam
tum sa kya hoga jahan men koi mujh sa bhi nahin
hashr ki bhiiḌ men ek ek ka munh takta huun
is bhari-bazm men ik janne vaala bhi nahin
husn ne da.avat-e-nazzara har ik rang se di
ishq ne aankh uTha kar kabhi dekha bhi nahin
ek tum ho ki tamannaon ke dushman hi rahe
ek main huun mujhe ehsas-e-tamanna bhi nahin
juzv-e-dil ban ke samati hai mohabbat dil men
ye vo kanTa hai ki hai aur khaTakta bhi nahin
yaad aati hai ‘saba’ be-vatnon ki kis ko
mujh ko yaran-e-vatan se koi shikva bhi nahin
Leave a Reply