Shahryar
gard ko kuduraton ki dho na paae ham
dil bahut udaas hai ki ro na paae ham
vajud ke chahar samt regzar tha
kahin bhi khvahishon ke biij bo na paae ham
ruuh se to pahle din hi haar maan li
bojh apne jism ka bhi dho na paae ham
dasht men to ek ham the aur kuchh na tha
shahar ke hujum men bhi kho na paae ham
ek khvab dekhne ki aarzu rahi
isi liye tamam umr so na paae ham
Leave a Reply