Ghair Ki Bad-Gumaniyon Pe Na Ja

Poet

ghair ki bad-gumaniyon pe na ja

be-haqiqat kahaniyon pe na ja

khinch leta hai daman-e-ehsas

phuul ki be-zabaniyon pe na ja

us ki gharat-gari ko dhyan men rakh

aql ki pasbaniyon pe na ja

sabr ki dosti ko rakh malhuz

jabr ki hukmaraniyon pe na ja

ḳhubs-e-batin ke zahr se bhi bach

mahz shirin-bayaniyon pe na ja

mustaqil zulm ka mudava kar

aarzi mehrbaniyon pe na ja

ruuh ki bhi pukar sun ‘aḳhtar’

jism ki kamraniyon pe na ja