Darshan Singh
aaj dil se dua kare koi
haqq-e-ulfat ada kare koi
jis tarah dil mira taḌapta hai
yuun na taḌpe ḳhuda kare koi
jan-o-dil ham ne kar diye qurban
vo na maane to kya kare koi
dil-e-betab ki tamanna hai
phir kahun main suna kare koi
mast nazron se ḳhud mira saaqi
phir pila.iye piya kare koi
mai-e-irfan ke ham bhi hain mushtaq
dar-e-mai-ḳhana va kare koi
shauq-e-didar dil men hai ‘darshan’
aa bhi jaa.e ḳhuda kare koi
Leave a Reply